الضومين والإستضافة | Domain & Hosting

 

أي موقع كاين فهاد العالم.. باش ندخلو ليه غايخصو يكون متاح فالأنترنت.. وباش يكون فالأنترنت غايخصو أماكن خاصة لي غايكون فيها وديك الأماكن خاصها تكون موصولة بالأنترنت دائما بدون انقطاع.. وخاصو يكون عندو مستضيف فين غايتحطو ملفات الزوار والمعلومات لي فيه..

اذن من هنا جات الفكرة ديال الإستضافة Hosting ولكن قبل مانشرحو شنو هي هاد الإستضافة غانشرحو شنو هو الدومين Domain.

الدومين

الدومين أو النطاق هو مثلا: google.com

هذا كيتسمى دومين.. وكاينين بزااف دالأنواع ديال الامتدادات ديال هاد الدومينات. منها ما هو عالمي ومنها ما هو تابع للدول.. فمثلا

com , net , org ..

هاذو كاع العالم يقدر يستعملهم يعني أي واحد..

لكن

ma , su , us , fr ...

هاذو تابعين للدول فقط.. بحال ma تابع للمغرب وغاتلقاه غا فالمواقع المغربية.. وأغلب هاد المواقع كيكونو تابعين للدولة.. حيت غاليين باش يشريهم شخص عادي. على عكس لاخرين لي يقدر أي واحد يخدم بيهم كيكونو رخاص..

هاد الدويمنات مايمكنش تلقى واحد معاود جوج مرات ولا اكثر.. كتلقى دومين واحد لي كاين فالعالم كامل. 

بحال مثلا الموقع ديالنا:

www.darijatec.com

ماغاديش تلقى حتى شي واحد فالعالم دايرو من غيرنا. ولكن راه يقدر يدير نفس الإسم ولكن يبدل الإمتداد. يقدر فبلاصة com يدير net وهاكا غايقدر يكون عندو دومين على هاد الشكل:

www.darijatec.net

حيت هاد الدومينات هما راهم عبارة عن أدريس ip فقط.

يعني الى كتبتي www.google.com

راها فالأصل هي :

216.58.211.196

يعني لا درتي copier/coller لهاد الآدريس فشي Browser غادية تخرج ليك google

النطاقات أو الدومينات هما فقط أسماء لهاد لي زادريس أيبي.. لأن العقل البشري ماغايقدرش يتفكر كااع هاد الاعداد كاملة لي كاينة فالعالم.. فخرجات فكرة DNS لي هو مسؤول على تغيير ليزادريس للأسماء.. وهاد الموضوع ديجا دويت عليه غاتلقاوه فالموقع تحت عنوان *بروتوكول DNS*

الإستضافة

ندوزو دبا للاستضافة أو Hosting هاد الإستضافة أسيادنا هي فين كيتحطو هاد المواقع وتماك فين كيكونو كاع المعلومات المتعلقة بالدومين وبلي دوني لي فيه ولي دوني ديال الناس لي كيدخلو ليه.. وهاد الاستضافات فيهم بزاف دالانواع كاين لي عيان وكاين لي متوسط وكاين لي مجهد.. داكشي على حسب الاحتياجات ديالك وعلى حسب جيبك.

حيت الموقع لي كيزوروه 100 ديال الاشخاص شهريا ماشي هو الموقع لي كيزوروه مليون.. يعني كل واحد والاستضافة ديالو.. وشحال ما كان عدد الزوار كبير خاص تكون الاستضافة أكبر..

دبا نتا من الصباح مصدعنا الاستضافة الاستضافة.. اشنو هي بعدا هاد الاستضافة شنو كتعني كشيء ملموس ولا لوجيك..

وخا الاستضافة هي عبارة عن سيرفر صافي.. غا هو كيكون سيرفر قوي بزاف حيت خاصو يتحمل الطرافيك لي غايدخل ليه ويتحمل سرعة نقل البيانات ويتحمل أنه يبقى خدام على مدار الأيام ومايحبسش.. غا هو نتا كمستخدم. تقدر تخدم بهاد السيرفر كسيرفر وهمي أو سيرفر حقيقي.. كيفاش ؟

الى كان عندك موقع صغير عادي راه غاتخدم غا بسيرفر وهمي.. يعني كيشدو داك السيرفر الضخم. وكيعطيوك منو واحد الطريف تخدم بيه. وماكتكونش عندك الصلاحية باش تحكم فكولشي من غير cpanel ديالك.. كتأجوطي فيها الدومين ديالك وتقاد داكشي لي كيخصك فقط.. وكذلك كيكونو اشخاص آخرين مشاركين معاك داك السيرفر.. كل واحد عاطيينو طريف كيتحكم فيه.. وكتبقى تكريه من عندهم للشهر ولا للعام..

ولكن لا كان عندك موقع كبير فغاتزيد تطور وتاخذ سيرفر خاص بك كتحكم فيه كيف ما بغيتي. وهذا هو لي كيكون السيرفر الحقيقي.. وكتخلص عليه ثمن طالع نيت..

هاد الانواع من السيرفرات كتميز بالقوة ديالها وأنها كتكون ديما مكونيكطيا باش أي واحد دخل لشي موقع فأي وقت يلقاه متاح.. وكيكونو مأمنين من ناحية الاختراق حيت كيسهرو عليهم ناس خبرة فالمجال.. وأيضا كيعتامدو على السرعة فمعدل نقل البيانات وكيتحملو الضغط ديال الطرافيك.. وكل سيرفر عندو مميزات وعيوب ديالو.. وطبعا شحال ما طلقتي الفلوس شحال ما كتكون ستافدتي من مميزات أكثر.

أما لا كان عندك موقع نيت وخا ماغايكونش عندك ههههه حيت انا هنا كندوي على فايسبوك و كوكل مثلا.. فهاذو ماكيخدموش بسيرفر عادي.. بل كيخدمو بواحد النوع سميتو Server Farms.. هما عبارة عن بزاااااف ديال السيرفرات داخل واحد القاعات لي كبيرة بزااف شي حاجة خيالية.. Data Center

حيت كتستاجب ملاااايين الطلبات فالثانية وكيكونو ساهرين عليهم دي طيكنيسيان من جميع الانواع.. من الناس لي كيخدمو فالمانطونونس والناس لي كيخدمو فالريزو وفالديفلوبمون والميكانيك وفالضو وفالما.. وكيخدمو 24/24  حيت ماخاص يوقع حتى شي خلل.

شراء الدومين والإستضافة

لمهم من بعد ماخذينا واحد النبذة صغيرة على هاد المفاهيم. ندوزو دبا لكيفاش تقدر حتى نتا تشري هاد الموقع والاستضافة ؟

الطريقة يا صديقي سهلة.. يا إما تشري الإستضافة من شي موقع وغايعطيوك معاها دومين مجاني لمدة سنة عاد تبدا تخلص عليه..

ومن بين هاد المواقع كاين:

Goddady , Hostgator , Bluehost, A2Hosting , FastComet

أو أنك تمشي تشري دومين بوحدو والاستضافة بوحدها على حسب نتا شنو كيناسبك.. فمثلا تقدر تشري الدومين من عند Namecheap وتشري الاستضافة من Hostgator وتربطهم مع بعضهم ماكاينش المشكل فهاد القضية..

كيفاش غاندير نشري الدومين؟

غاتمشي مثلا لشي موقع لي مختص فبيع الدومينات ولي من أشهرهم Goddady و Namecheap مثلا ولنأخذ هذا الأخير لأنني أنا شخصيا أفضلها.

غاتدخل للموقع الرسمي ديالهم:

www.namecheap.com

غاتطلع ليك خانة ديال الروشيرش. كتكتب فيها اسم الدومين ديالك بالامتداد لي باغي نتا.. وهما كيطلعو ليك النتائج لي كاينين.. وكيقولو لك واش متاح ولا داه شي حد قبل منك وكيطلعو ليك حتى الثمن ديالهم بشحال غاتشريه لمدة سنة وشحال غاتولي تخلص عليه من بعد.. تقدر تمشي للانترنت وتقلب على شي Coupons ديال التخفيض.. فمثلا لا لقيتي شي دومين داير 10 دولار يعني 100 درهم ديالنا.. تقدر بفضل داك الكوبون ترجعو ب 70 درهم.. وهاكا غاتكون نقصتي عليك مصاريف الشراء.. صافي كتاخذ الدومين لي ايناسبك وكتخلصهم سواء ب PayPal ولا ب Crédit Carte لي بغيتي نتا.. وللإشارة Namecheap كيدعم حتى البايبل الغير مفعل. وكتدخل الايميل ديالك لي بغيتي يتكونيفرما بيه الدومين ديالك.  وكتدخل ال user والباسوورد ديالك باش غاتبقى تدخل ليه.

وهاكا كيكون عندك الموقع ديالك بصحتك. 

دبا ندوزو للاستضافة تقدر تشريها أيضا من Namecheap تا هي.. كاينين أنواع ديال الاستضافات. لي كتختار الباك لي غايناسبك فيها. وواش بغيتي تخلص عليه للشهر ولا للعام..

كتب فالروشيرش Shared Hosting Namecheap غايطلعو ليك.

كنلقاو ثلاثة الأنواع ديال الهوستينغ.

كاين النوع الاول لي هو العيان ولي سميتو Stellar الثمن ديالو شي 20 درهم.

وكاين النوع الثاني لي متوسط وسميتو Stellar Plus والثمن ديالو شي 30 درهم.

والنوع الثالث Stellar Business ولي الثمن ديالو 50 درهم..

وكل واحد والمميزات ديالو دخل نتا وكتاشفهم راسك.

من بعد ماكتشريها باتباع خطوات بساط نيت.. كتكون ولات عندك استضافة ودومين.. ومن بعد كتدخل للاستضافة ديالك وفال Cpanell غاتلقى جميع الاعدادات تماك. وأجوطي الدومين ديالك فيها.

الواجهة ديال أغلب cpanell هي واجهة سهلة للمستخدم وتقدر ترجعها باللغة العربية الى مافهمتيش الانجليزية.. يعني ماغاتلقاش مشكل معاها..

ومن بعد القرار كيكون عندك نتا.. واش بغيتي تحط هاد الدومين ديالك فشي منصة مثل Wordpress ولا Blogger ولا Jomla ولا عند ديجا شي موقع قاديتيه ف Local host ديالك وبقى خاصك غا الدومين.. لمهم نتا كتختار شنو بغيتي..

فالموقع نيت غاتلقاو مقال شرحت فيه الفرق بين الووردبريس vs بلوجر 

ولنأخذ على سبيل المثال بغيتي تخدم فال Blogger لي هي منصة تابعة لشركة Google ولي اصلا تقدر تنشأ فيها مدونة ديالك فاابور وكتعطيك دومين من عندها لكن كيكون مدموج فيه الاسم ديال البلوجر.. ماعلينا كتمشي كتدخل لبلوجر عن طريق الجيمايل ديالك..

وكتكريي مدونة جديدة وكدير الاسم لي بغيتي وهما كيعطيوك دومين من عندهم باش غاتخدم المدونة.. فنتا غاتمشي للباراميطر وتبدل الدومين لي عطاوك بالدومين لي شريتي جديد.. وغاتمشي للاعدادات ديال DNS فالدومين ديالك وتاخذ الاعدادات لي غاتعطيك Google وتمشي تحطهم فالدومين ديالك باش هاكا تبث ملكية موقعك.. وفنفس الوقت كيولي الدومين ديالك خدام بسيرفر DNS ملي كيطلبو شي حد كيستاجب ليه.. وهاذي عملية معقدة شيئا ما ماغانهضروش عليها هنا حيت خاصها مقال بوحدها.. مهم هاذي كانت غا نبذة مختصرة وفكرة صغيرة باش تفهمو البلانات كيفاش دايرة.. فالموقع غانحط مقال جد مفصل على هادشي كامل وغانزيد نتعمق أكثر على شنو هما انواع الاستضافات والمزايا والعيوب ديالهم.. وايضا غانشرح كيفاش تشري الدومين والاستضافة بالصور والفيديو.. ونشرح أيضا كيفاش تربط الموقع ديالك بالمدونة ديال Blogger.

مهم هاد المقال غا زربت عليه وكنحس براسي ماعطيتش فيه بزاف دالمعلومات تكون وصلات الفكرة. حيت هادشي كبير بزاف وخاصو بزاف دالوقت للشرح. والوقت هو لي ماكاينش باش نشرحو كولشي.

شكرا على القراءة.